sasiveಭಾರತಿ ಬಿ ವಿ ಯವರ “ಸಾಸಿವೆ ತಂದವಳು” ಒಂದು ಸ್ಫೂರ್ತಿದಾಯಕ ಪುಸ್ತಕವೆನ್ನುವುದರಲ್ಲಿ ಎರಡು ಮಾತಿಲ್ಲ .. ಪುಸ್ತಕಕ್ಕೆ ನೇಮಿಚಂದ್ರರ ಉತ್ತಮವಾದ ಮುನ್ನುಡಿಯೂ ಜೋಗಿರವರ ಹಾರೈಕೆಯೂ ಜೊತೆಯಾಗಿದೆ. ಇಲ್ಲಿ ಭಾರತಿಯವರು ಸಾವನ್ನ ಕುರಿತಂತೆ ಹೇಳಿಲ್ಲ . ಸಾವು ಬಂದು ಅಪ್ಪುವುದೆಂಬ ಭಯದ ನೆರಳು ತಿಳಿಸುವ ಬದುಕಿನ ಮಹತ್ವವನ್ನು ಹೇಳಿದ್ದಾರೆ.

ಬದುಕೆಂಬ ನಿಧಿಯನ್ನು ವಿಧಿಯೆಂಬ ಮಾಯಾವಿ ಯಾವ ಕ್ಷಣದಲ್ಲಿ ಯಾವ ವಿಧದಲ್ಲಿ ಕಸಿಯುತ್ತಾನೋ ಯಾರೂ ಬಲ್ಲವರಿಲ್ಲ. ಆದರೂ ಊಹಿಸದೇ ಬರುವ ಸಂಕಟಗಳನ್ನು ಎದುರಿಸದೇ ವಿಧಿಯಿಲ್ಲ. ಆದರೆ ಬದುಕು ಅದರಲ್ಲಿನ ಕನಸು ನಾಳೆಯೆಂಬ ನಂಬಿಕೆಗೆ ಸ್ವಲ್ಪವೇ ಸ್ವಲ್ಪ ಧೈರ್ಯ.. ಛಲ.. ಒಡಗೂಡಿದಾಗ ಮಾತ್ರ ಅಂತಹ ಪರಿಸ್ಥಿತಿಯಲ್ಲಿ ಮುನ್ನುಗ್ಗಬಹುದು.

ಹೆದರಿಕೆ ಭಯ ಸ್ವಭಾವದ ಹೆಣ್ಣು ಸೂಜಿ ಚುಚ್ಚಿಸಿಕೊಳ್ಳಲು ಹೆದರುವಾಕೆ ಭಯಂಕರ ಖಾಯಿಲೆಯಿಂದ ನರಕಯಾತನೆಯ ಕೀಮೋಥೆರಪಿಗೆ ತನ್ನನ್ನು ತಾನು ಮಾನಸಿಕವಾಗಿ ಸಜ್ಜುಗೊಳಿಸಲು ಪಡುವ ಪಾಡು … ಅಬ್ಬಾ ಮನಸಿನ ತುಮುಲಗಳನ್ನು ವೇಧನೆಯನ್ನು ವ್ಯಕ್ತಪಡಿಸಿರುವ ರೀತಿ …. ಬದುಕಬೇಕೆಂಬ ಬಯಕೆಯ ಹೊತ್ತು ಬದುಕಿನ ಕ್ಷಣ ಕ್ಷಣದ ಮಹತ್ವವನ್ನು ಹೇಳಿರುವ ರೀತಿ ಆಶ್ಚರ್ಯ ಹುಟ್ಟಿಸುತ್ತದೆ. ಆಕೆ ಅಲ್ಲಲ್ಲಿ ಹೇಳಿರುವ ವಿಚಾರಗಳು ಬದುಕಿನ ಬಗೆಗೆ ಆಸೆಯನ್ನು ಅದರಲ್ಲಿನ ಆಸ್ಥೆಯನ್ನು ಓದುಗರನ್ನು ಬೇಗ ಬೇಗ ಓದುವಂತೆ ಪ್ರೇರೇಪಿಸುತ್ತದೆ.

ಬದುಕಿನ ಸವಾಲುಗಳಿಗೆ ಸಜ್ಜಾಗುವುದು ಬೇರೆ. ಜೊತೆಯಲ್ಲಿ ಮನೆಯವರು ಸ್ನೇಹಿತರು ತನ್ನವರೇ ಎಂಬ ಜೀವಗಳು ಜೊತೆಯಿರುವರೆಂಬ ನಂಬಿಕೆ … ಆದರೆ ಜೀವದೊಂದಿಗೆ ಆಟವಾಡುವ ಖಾಯಿಲೆ ಬೇಡವಾದ ಅಥಿತಿಯಾಗಿ ಬಂದಾಗ ಆಹ್ವಾನ ನೀಡದಿದ್ದರೂ ಅದ ಬಂದು ನೀಡುವ ಉಪದ್ರ ಎಂಥಹ ಗಟ್ಟಿ ಮನಸ್ಸನ್ನು ಟೊಳ್ಳಾಗಿಸುತ್ತದೆ …. ಸಾವನ್ನು ಮೆಟ್ಟಿ ನಿಲ್ಲಲಾರದು ನಿಜ ಆದರೆ ಅದು ಬರುವ ಸಮಯ ಬಂತೆಂದಾಗಲೂ ಬದುಕು ಮುಗಿದಿಲ್ಲ ಅದನ್ನು ಅಪ್ಪಿದಂತಹ ಬಂಧನ ಸಡಿಲವಾಗಿಲ್ಲ ಎಂಬ ಮಾನಸಿಕ ಸ್ಥೈರ್ಯವೇ ಅವರು ಗುಣಮುಖರಾಗಲು ಜೊತೆಯಾಗಿ ಬಂದದ್ದು ಎಂದರೆ ಸುಳ್ಳಲ್ಲ .

ಬದುಕು ಬವಣೆಯಲ್ಲ … ಭಾವನೆಗಳ ಪೀಠಿಕೆ … ಜೀವ ಜೀವನಗಳ ನಡುವಿನ ಪರದೆ ಎಷ್ಟು ಪಾರದರ್ಶಕ…. ಹೀಗೆ ಹೇಳುತ್ತಾ ಹೋದರೆ ಇದು ಮುಗಿಯದು .. ಭಾರತಿಯವರೇ ಹೇಳಿದಂತೆ ಸ್ಫೂರ್ತಿದಾಯಕ ಹೋರಾಟ ಕಥನ … ಕ್ಯಾನ್ಸರ್ ಖಾಯಿಲೆಯಿಂದ ಹೆದರುವವರಿಗೆ ಕೈಪಿಡಿಯಂತಹ ಒಂದು ವಾಸ್ತವ ಕೃತಿಯನ್ನು ಜೀವನೋತ್ಸಾಹದಿಂದ ಬರೆದಿರುವ … ಅಂತಹ ಸಂದರ್ಭದಲ್ಲೂ ಅಲ್ಲಲ್ಲಿ ಹಾಸ್ಯಪ್ರಜ್ಞೆ ಮೆರೆದಿರುವ Bharathi B V ಯವರಿಗೆ ಅಭಿನಂದನೆಗಳು ..

ಸಣ್ಣಪುಟ್ಟ ಖಾಯಿಲೆಗೂ …. ಖಾಯಿಲೆ ಎಂಬುದು ನನ್ನ ಮಟ್ಟಿಗೆ ದೊಡ್ಡ ಮಾತೇ ಬಿಡಿ… ಚಿಕ್ಕಪುಟ್ಟ ವಿಷಯಗಳಿಗೂ ಹೆದರುವ ನನಗೆ, ನನ್ನನ್ನು ಪರಿಚಯವಾದ ಅತೀ ಕಡಿಮೆ ಸಮಯದಲ್ಲಿ ಹೆಚ್ಚಾಗಿ ಅರ್ಥ ಮಾಡಿಕೊಂಡ ಕೆಲವೇ ಸ್ನೇಹಿತರಲ್ಲಿ ಗಣೇಶ್ ರವರು ಪುಕ್ಕಲು ಮನಸ್ಥಿತಿಯ ನನಗೆ ಇಂತಹ ಒಂದು ಪುಸ್ತಕವನ್ನು ಓದಲು ಪ್ರೇರೇಪಿಸಿದ ಆತ್ಮೀಯ ಸ್ನೇಹಿತರಾದ Ganesh Karkera ರವರಿಗೆ ಧನ್ಯವಾದಗಳು ….

Advertisements